Comunicámoslle que o Concello de Bande celebrará mañá, xoves 10 de xullo ás 12:00 horas, no salón de Actos da Casa do Concello, o acto oficial de declaración como Fillo Adoptivo de D. Antonio Rodríguez Colmenero, en recoñecemento aos extraordinarios méritos acumulados ao longo da súa traxectoria académica, profesional e investigadora.
Este nomeamento supón unha merecida homenaxe á súa dedicación desinteresada e apaixonada á recuperación, estudo e posta en valor do patrimonio arqueolóxico do noso concello, e moi especialmente ao complexo romano de Aquae Querquennae, cuxo legado histórico e científico contribuíu de maneira decisiva a divulgar e preservar.
O acto contará coa presenza de representantes institucionais, autoridades locais, entidades culturais e veciños e veciñas de Bande, que queren así amosar o seu agradecemento a unha figura clave para o coñecemento e promoción do noso pasado romano.
